Հարուստ տեսք ունենալու համար պետք է գնել թանկարժեք հագուստ և մշտապես հետևել նորաձևության բոլոր միտումներին:
Սա անհատական ոճի, իսկպաես գեղեցիկ կերպարներ ստանալու ամենամեծ միֆն է, եթե դուք էլ համաձայն եք այս կարծրատիպը կոտրել, ապա կարդացեք շարունակությունն ու եկեք միասին պարզենք, թե ինչ նորաձև հնարներ կարելի է կիրառել հարուստ ու ոճային կերպարներ ստանալու համար:
Մոնոքրոմ
Ոտքից գլուխ միագույն կերպարները միշտ հարուստ տեսք ունեն, ավելին, մոնոքրոմի օգնությամբ կարելի է նաև կազմվածքի որոշ հատկություններ շտկել, օրինակ՝ ավելի բարձրահաստ երևալ, այո՛, մոնոքրոմը օգնում է նաև այս հարցում: Մի հնարք ևս ավելացնենք. աշխատեք մոնոքրոմի մեջ օգտագործված հագուստի մասերը ընտրել տարբեր ֆակտուրաներով, սա ևս կնպաստի ազդեցիկ կերպար ստանալու գործին:
Վառ նավակ-կոշիկներ
Գնեք մեկ կամ մի քանի զույգ վառ գույնի նավակ-կոշիկներ, ցանկալի է միջին բարձրության կրունկով, բայց նույնիսկ դրանց լրիվ տափակ տարբերակները ևս իրենց առաքելությունը կկատարեն: Վառ կոշիկները հասարակ կերպարի ամենալավ համեմունքն են, պատկերացրեք՝ հասարակ շապիկը կամ բլուզը ջինսե ամենասովորական տաբատի հետ և մեկ զույգ վառ կոշիկ, վե՛րջ, ամեն ինչ կարգին է:
Ոչ փայլին
Առջևում ձմեռ է և գործված հագուստը սովորաբար ընտրում ենք որևէ փայլուն դետալով՝ մտածելով, որ դա կհարստացնի կերպարը, բայց հավատացեք, որ սվիտերը, ժակետը կամ գործված զգեստը առանց քրիստալների շատ ավելի դասական ու գեղեցիկ կդիտվի տարբեր համադրությունների մեջ:
Չոր ֆորմայի պայուսակներ
Երկրաչափական տարբեր ուրվագծեր ունեցող չոր պայուսակները միշտ շատ ավելի լավ տեսք ունեն, քան պարկանմանները: Հատկապես լավ ընտրություն կլինի ոչ սև տարբերակը:
Ֆուրնիտուրա
Մշտապես ուշադրություն դարձրեք կոճակների, ճարմանդների, կայծակ-շղթաներ որակին, հագուստն ինքը կարող է թանկարժեք չլինել, բայց այդ մասին կխոսեն միայն մետաղե դետալները, այնպես որ կարելի է գնել այն պիջակը, որ հավանել եք, և որը մատչելի է, և փոխել կոճակները:
Տարվա սառը եղանակի գույնն այսուհետ սպիտակը կամ բեժն է
Բաց գույնի հագուստը շատ շահեկան տեսք ունի հատկապես տարվա սառը եղանակին, համաձայն եմ, պրակտիկ չէ, բայց հավատացե՛ք, քիմմաքրումն արժե այն ազդեցությունը, որ կթողնեք բաց գույնի total-look-ով:
Խնամվածությունը
Նույնիսկ ամենաթանկարժեք կերպարը կխամրի, եթե ձեր մազերն ու եղունգները խնամված չեն, այնպես որ, գեղեցկության սրահի ծախսերը կրճատել պետք չէ:
Եվ ամենավերջում, երբեք մի կրեք այն հագուստը, որի մեջ անհարմար եք զգում, որովհետև ցանկացած, նույնիսկ ամենալավ մշակված կերպարի ամենակարևոր դետալը ձեր ինքնավստահությունն է, հաստատուն քայլվածքը և ուղիղ կեցվածքը: