Սկսում ենք զարդարել հագուստը մետաքսե գլխաշորերով, ինչու՞, որովհետև ավելի տաք հագուստի մուգ երանգները նոր գույներով խաղացնելու ժամանակն է:
Արդարության համար պետք է ասել, որ այդ նույն գլխաշորը կամ թաշկինակը կարող է նաև նուրբ, պաստելային երանգներ ունենալ, սակայն միայն դրա առկայությունը ձեր կերպարին թարմություն ու եթերայնություն կհաղորդի: Ստորև կներկայացնենք մի քանի հրաշալի տարբերակ այն մասին, թե ինչպես կարելի է կիրառել գլխաշորն ամենօրյա կերպարներում և մշտապես հաճելիորեն զարմացնել ձեր թարմ արտաքինով մտերիմներին:
Փաթաթել պարանոցի շուրջը պիջակի, կիսաբաճկոնի կամ թրենչի հետ, այո կարող է ցանկացած ոք, իսկ դուք փրձեք թաշկինակի ծայրերը թաքցնել սվիտերի, ժակետի կամ վերնաշապիկի օձիքի տակ, մանրուք է, բայց կխաղա իր դերը:
Վստահաբար կա գլխին թաշկինակը կապելու մի ձև, որը սազում է ձեզ, բայց դուք միշտ մտածում եք, դե լավ կարևոր չի, և հենց այստեղ էլ սխալվում եք, իհարկե կարևոր է: կարող եք գլխաշորը կապել դասական եղանակով, կամ ծալել մի քանի անգամ և գլխակապի նման կրել: ևս մեկ հրաշալի տարբերակը գլխաշորը կրել մեկ այլ գլխարկի հետ՝ բերետի, լայնափող գլխարկի կամ ցիլինդրի հետ. ի դեպ, սա վերջին սեզոնի ամենաակտիվ թրենդերից մեկն է, ոճային և նորաձև կստացվի միաժամանակ:Արդեն մի քանի սեզոն է, ինչ գլխաշորը կամ թաշկինակը մեծ հաջողության կատարում են մազակալի դեր՝ հավաքելով վարսերը ցածր կամ բարձր պոչիկի տեսքով: Այս նպատակով կարելի է վերցնել թե մեծ` 90*90 սմ տարբերակը, թե 45*45 սմ տարբերակը:
Այն մասին, որ թաշկինակը հաճախ կապում կամ փաթաթում են պայուսակի բռնակին՝ վստահ եմ, որ գիտեք, բայց ևս մեկ անգամ հիշեցնելն ավելորդ չի լինի: Թաշկինակը՝ գոտի, այո այն կարելի է գոտու փոխարեն և վերջինիս տեղում կրել ջինսե տաբատների, անգամ դասական տաբատների հետ, փորձե՛ք, վստահաբար հավանելու եք:
Ամբողջ աշխարհում բոլորը մեր օրերին դիմակներ են կրում, թեևս չեմ զարմացնի եթե ասեմ, որ այո՛, գործվածքե դիմակներ նույնպես շատերն են կրում, այդ դեպքում ինչու հասարակ կտորե դիմակի փոխարեն չի կարելի է կրել փոքր մետաքսե թաշկինակ, ինչպես անում էին մի քանի հարյուր տարի առաջ հին ու բարի վեստերնների հերոսները:
